6 ເດືອນ ໄຟຟ້າລາວສາຂາແຂວງເຊກອງ ມອບພັນທະໃຫ້ລັດ 1,8 ຕື້ກີບ

18/09/2022

6 ເດືອນ ໄຟຟ້າລາວສາຂາແຂວງເຊກອງ ມອບພັນທະໃຫ້ລັດ 1,8 ຕື້ກີບ

ຕາມການລາຍງານຂອງທ່ານ ພູທົງ ຫຼວງໄຊຍະລາດ ວ່າການຫົວໜ້າລັດວິສາຫະກິດໄຟຟ້າລາວສາຂາແຂວງເຊກອງ ໃຫ້ຮູ້ວ່າ: ລັດວິສາຫະກິດໄຟຟ້າລາວສາຂາແຂວງເຊກອງ ແມ່ນເປັນລັດວິສາຫະກິດໜຶ່ງທີ່ສາຍຕັ້ງຂຶ້ນກັບລັດວິສາຫະກິດໄຟຟ້າລາວສໍານັກງານໃຫຍ່ນະຄອນຫຼວງວຽງຈັນ ແລະ ສາຍຂວາງຂຶ້ນກັບພະແນກພະລັງງານ ແລະ ບໍ່ແຮ່ແຂວງເຊກອງ. ໃນ 6 ເດືອນຕົ້ນປີ 2022 ລັດວິສາຫະກິດໄຟຟ້າລາວສາຂາແຂວງເຊກອງ ໄດ້ເຮັດໜ້າທີ່ທາງດ້ານການເມືອງ ແລະ ວິຊາສະເພາະຂອງຕົນ ຕາມການມອບໝາຍຂອງຂັ້ນເທິງດ້ວຍຄວາມຮັບຜິດຊອບສູງເປັນຕົ້ນ ການບໍາລຸງຮັກສາສາຍສົ່ງໄຟຟ້າ ແລະ ຂະຫຍາຍຕາຂ່າຍໄຟຟ້າອອກສູ່ເຂດຊົນນະບົດຫ່າງໄກສອກຫຼີກ ເພື່ອສະໜອງກະແສໄຟຟ້າໃຫ້ປະຊາຊົນພາຍໃນແຂວງໄດ້ຊົມໃຊ້ຢ່າງທົ່ວເຖິງ.
ໂດຍປັດຈຸບັນ ທົ່ວແຂວງມີຕາຂ່າຍໄຟຟ້າ 0,4 ກິໂລໂວນ ຍາວ 415.378 ກິໂລແມັດ ທຽບໃສ່ປີ 2021 ເພີ່ມຂຶ້ນ 6.556 ກິໂລແມັດ; ຕາຂ່າຍ12,7-35 ກິໂລໂວນ ຍາວ 953.304 ກິໂລແມັດ ເພີ່ມຂຶ້ນ 4.199 ກິໂລແມັດ; ມີໝໍ້ແປງ 572 ໜ່ວຍ ເພີ່ມຂຶ້ນ 14 ໜ່ວຍ, ມີກໍາລັງຕິດຕັ້ງທັງໝົດ 78.172 ກິໂລໂວນອໍາແປ; ມີໝໍ້ນັບໄຟ 20.096 ໜ່ວຍ ທຽບໃສ່ປີ 2021 ເພີ່ມຂຶ້ນ 649 ໜ່ວຍ; ມີບ້ານໄດ້ຊົມໃຊ້ໄຟຟ້າແລ້ວ 157 ບ້ານກວມເອົາ 78,89%, ຫຼັງຄາເຮືອນໄດ້ຊົມໃຊ້ໄຟຟ້າ 17,940 ຫຼັງຄາເຮືອນກວມເອົາ 83,59% ຂອງຈໍານວນຫຼັງຄາເຮືອທັງໝົດທົ່ວແຂວງ.
ທ່ານ ພູທົງ ຫຼວງໄຊຍະລາດ ໃຫ້ຮູ້ຕື່ມວ່າ: ໃນ 6 ເດືອນຕົ້ນປີ 2022 ລັດວິສາຫະກິດໄຟຟ້າລາວສາຂາແຂວງເຊກອງ ສາມາດເກັບລາຍຮັບໄດ້ທັງໝົດ 24 ຕື້ກວ່າກີບ ໃນນີ້ມອບພັນອາກອນເຂົ້າງົບປະມານ 1,8 ຕື້ກວ່າກີບ ແລະ ມີໜີ້ສິນຄ່າກະແສໄຟຟ້າຂອງຜູ້ຊົມໃຊ້ທັງໝົດ 2 ຕື້ກວ່າກີບ ທຽບໃສ່ທ້າຍປີ 2021 ຫຼຸດລົງ 68 ຕື້ກີບ ໃນນັ້ນພາກສ່ວນທີ່ກັບສູນກາງ 360 ລ້ານກວ່າກີບ; ພາກສ່ວນທີ່ກັບງົບປະມານສາຍຕັ້ງ 742 ລ້ານກວ່າກີບ; ພາກສ່ວນທີ່ຂຶ້ນກັບງົບປະມານຂອງແຂວງ 828 ລ້ານກວ່າກີບ ແລະ ພາກສ່ວນທີ່ຂຶ້ນກັບງົບປະມານຂອງເມືອງ 116 ລ້ານກວ່າກີບ.
 
(ຂ່າວ: ສັນຍາ)

 

ວິ​ທີ​ກຳ​ຈັດ​ໜອນ​ນ້​ຳຍູງ​ລາຍ
Facebook ຂ່າວ​ເຊກອງ
Facebook ຂ່າວ​ໂທ​ລະ​ພາບ