ລະມາມ ປະກາດພະນັກງານ-ນຳພາຄຸ້ມຄອງເຂົ້າຮັບອຸດໜູນບໍານານ ແລະ ແຕ່ງຕັ້ງຜູ້ວ່າການແທນ

19/09/2022

ລະມາມ ປະກາດພະນັກງານ-ນຳພາຄຸ້ມຄອງເຂົ້າຮັບອຸດໜູນບໍານານ ແລະ ແຕ່ງຕັ້ງຜູ້ວ່າການແທນ

ວັນທີ 9 ກັນຍາ 2022 ນີ້, ເມືອງລະມາມ ໄດ້ຈັດພິທີປະກາດພະນັກງານ-ລັດຖະກອນ ອອກພັກຜ່ອນ-ຮັບອຸດໜູນບຳນານ 2 ຫ້ອງການ ແລະ ແຕ່ງຕັ້ງຜູ້ວ່າແທນ ຈັດຂຶ້ນທີ່ສະໂມສອນເມືອງລະມາມ ໂດຍໃຫ້ກຽດເປັນປະທານຂອງທ່ານ ວົງເດືອນ ຈັນທະບຸດຊຽງ ກຳມະການພັກແຂວງ ເຈົ້າເມືອງລະມາມ, ມີແຂກທີ່ຖືກເຊີນຂັ້ນແຂວງ-ຂັ້ນເມືອງ,​ ພ້ອມດ້ວຍພະນັກງານ-ລັດຖະກອນພາຍໃນຫ້ອງການເຂົ້າຮ່ວມ.
ທ່ານ ວິໄລທອງ ສຸວັນນະສານ ຮອງຫົວໜ້າຫ້ອງການພາຍໃນເມືອລະມາມ ໄດ້ຮັບກຽດຂຶ້ນຜ່ານຂໍ້ຕົກລົງຂອງທ່ານເຈົ້າແຂວງ ແຂວງເຊກອງ, ສະບັບເລກທີ 159/ຊກ, ລົງວັນທີ 25 ກໍລະກົດ 2022 ວ່າດ້ວຍອະນຸມັດໃຫ້ທ່ານ ສຸພາບ ຜິວຄຳພາ ສັງກັດຢູ່ຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງລະມາມ ອອກພັກຜ່ອນ-ຮັບອຸດໜູນບໍານານ ເລີ່ມແຕ່ງວດ III (7-8-9) ປີ 2022 ເປັນຕົ້ນໄປ,​ ຜ່ານຂໍ້ຕົກລົງຂອງທ່ານເຈົ້າແຂວງ ແຂວງເຊກອງ, ສະບັບເລກທີ 166/ຊກ, ລົງວັນທີ 11 ກໍລະກົດ 2022 ວ່າດ້ວຍອະນຸມັດໃຫ້ທ່ານ ນາງ ເພັດສະໄໝ ທອງປັນຍາ ສັງກັດຢູ່ຫ້ອງການເຕັກໂນໂລຊີ ແລະສື່ສານເມືອງລະມາມ ອອກພັກຜ່ອນ-ຮັບອຸດໜູນບໍານານ ເລີ່ມແຕ່ງວດ III (7-8-9) ປີ 2022 ເປັນຕົ້ນໄປ. ຈາກນັ້ນທ່ານ ໄຂຄຳ ດອຍສີທົນ ກຳມະການພັກ ຫົວໜ້າຄະນະຈັດຕັ້ງເມືອງລະມາມ ກໍ່ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າເມືອງ ເມືອງລະມາມ ເລກທີ 351/ລມ ລົງວັນທີ 8 ກັນຍາ 2022​ ວ່າດ້ວຍແຕ່ງຕັ້ງ ທ່ານ ເພັດລຳພັນ ຄຳຜາສຸກ ວ່າການແທ່ນຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງລະມາມ, ຜ່ານຂໍ້ຕົກລົງຂອງທ່ານເຈົ້າເມືອງ ເມືອງລະມາມເລກທີ 352/ລມ ລົງວັນທີ 8 ກັນຍາ 2022​ ວ່າດ້ວຍແຕ່ງຕັ້ງ ທ່ານ ໜູເພັດ ພາໄຊ ຮອງຫົວໜ້າຫ້ອງການເຕັກໂນໂລຊີ ແລະ ສື່ສານເມືອງ ເປັນຜູ້ວ່າການແທນຫົວໜ້າຫ້ອງການເຕັກໂນໂລຊີ ແລະ ສື່ສານເມືອງ, ຜ່ານຂໍ້ຕົກລົງຂອງທ່ານເຈົ້າເມືອງລະມາມ ເລກທີ 353/ລມ ລົງວັນທີ 8 ກັນຍາ 2022 ວ່າດ້ວຍແຕ່ງຕັ້ງທ່ານ ພົງສະຫວັດ ສີບຸນໃໝ່ ເປັນຮອງປະທານອົງການພັດທະນາ ແລະບໍລິການຕົວເມືອງ. ພ້ອມນີ້ ກໍ່ໄດ້ຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 16/ຄປພຂ ວ່າດ້ວຍບົ່ງຕົວແຕ່ງຕັ້ງ ສະຫາຍ ນາງ ຄຳໃບ ຖິ່ນມ່ວນແທ້ ຮອງຫົວໜ້າຄະນະຈັດຕັ້ງເມືອງ ເປັນກຳມະການພັກເມືອງເພື່ອທົດແທນຕຳແໜ່ງທີ່ວາງລົງຕື່ມອີກ.
ໂອກາດນີ້ທ່ານ ວົງເດືອນ ຈັນທະບຸດຊຽງ ກໍ່ໄດ້ມີຄໍາເຫັນສະແດງຄວາມຍ້ອງຍໍຊົມເຊີຍຕໍ່ບັນດາທ່ານ ທີ່ຮັບອຸດໜູນບໍານານ ທີ່ໄດ້ອຸທິດເຫື່ອແຮງ, ສະຕິປັນຍາ, ຄວາມຮູ້ຄວາມສາມາດ ເຂົ້າໃນການປະຕິບັດໜ້າທີ່ໃນໄລຍະຜ່ານມາ ແລະ ໄດ້ເນັ້ນໃຫ້ຜູ້ທີ່ຮັບໜ້າທີ່ໃໝ່ ຈົ່ງສືບຕໍ່ນໍາພາ-ຊີ້ນໍາແນວທາງຂອງພັກ ນະໂຍບາຍຂອງລັດ ພາຍໃນກົມກອງຂອງຕົນໃຫ້ໄດ້ຮັບໝາກຜົນສຳເລັດເທື່ອລະກ້າວ.​
#ຂ່າວ: ຕະບະ
#ກວດແກ້: ດາວສະຫວັນ

 

ວິ​ທີ​ກຳ​ຈັດ​ໜອນ​ນ້​ຳຍູງ​ລາຍ
Facebook ຂ່າວ​ເຊກອງ
Facebook ຂ່າວ​ໂທ​ລະ​ພາບ