ເຈົ້າແຂວງເຊກອງ ຕ້ອນຮັບທູດອິນເດຍ ປະຈໍາລາວ

15/11/2022

ເຈົ້າແຂວງເຊກອງ ຕ້ອນຮັບທູດອິນເດຍ ປະຈໍາລາວ

ໃນວັນທີ 14 ພະຈິກ 2022 ທີ່ຫ້ອງວ່າການແຂວງເຊກອງ, ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ຕ້ອນຮັບ ທ່ານ ດິງກາ ອັດຕະນາ ເອກຄັກຄະລັດຖະທູດວິສາມັນຜູ້ມີອໍານາດເຕັມແຫ່ງ ອິນເດຍ ປະຈໍາລາວ ພ້ອມຄະນະ ໃນໂອກາດມາຢ້ຽມຢາມ ແລະ ເຮັດວຽກຢູ່ແຂວງເຊກອງ.

ໂອກາດນີ້, ທ່ານ ເຫຼັກໄຫຼ ສີວິໄລ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມແຂວງເຊກອງໃນຄັ້ງນີ້ ຊຶ່ງເປັນຄັ້ງທໍາອິດຂອງທ່ານທູດອິນເດຍ ປະຈໍາລາວ; ພ້ອມທັງຕີລາຄາສູງຕໍ່ການພົວພັນຮ່ວມມື, ການຊ່ວຍເຫຼືອຂອງປະເທດອິນເດຍຕໍ່ ສປປ ລາວ ໃນໄລຍະຜ່ານມາເວົ້າລວມ, ເວົ້າສະເພາະແມ່ນການຊ່ວຍເຫຼືອແຂວງເຊກອງເປັນຕົ້ນ ໂຄງການກໍ່ສ້າງໂຮງຮຽນມັດທະຍົມສົມບູນເມືອງກະລຶມ ຊຶ່ງເປັນການປະກອບສ່ວນສໍາຄັນເຂົ້າໃນການພັດທະນາວຽກງານການສຶກສາຂອງແຂວງໃຫ້ດີຂຶ້ນເປັນກ້າວໆ. ພ້ອມນີ້ ທ່ານເຈົ້າແຂວງ ຍັງໄດ້ຍົກໃຫ້ເຫັນສະພາບທີ່ຕັ້ງ, ຈຸດພິເສດ, ທ່າແຮງບົ່ມຊ້ອນ, ການພັດທະນາພື້ນຖານໂຄງລ່າງເສດຖະກິດ-ສັງຄົມ ແລະ ການແກ້ໄຂຄວາມທຸກຍາກຂອງປະຊາຊົນບັນດາເຜົ່າ.

ພ້ອມນັ້ນ, ທ່ານທູດອິນເດຍ ປະຈໍາລາວ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບຂອງທ່ານເຈົ້າແຂວງເຊກອງ ພ້ອມທັງໄດ້ຍົກໃຫ້ເຫັນເຖິງຈຸດປະສົງຂອງການມາຢ້ຽມຢາມແຂວງເຊກອງໃນຄັ້ງນີ້ ກໍ່ເພື່ອເຂົ້າຮ່ວມພິທີວາງສີລາລືກໂຄງ ການກໍ່ສ້າງໂຮງຮຽນມັດທະຍົມສົມບູນກະລຶມ ເມືອງກະລຶມແຂວງເຊກອງ ຊຶ່ງເປັນໂຄງການທີ່ລັດຖະບານສາທາລະນະລັດອິນເດຍໃຫ້ການຊ່ວຍເຫຼືອ ພາຍໃຕ້ຂອບການຮ່ວມມືລະຫວ່າງແມ່ນໍ້າຂອງ-ແມ່ນໍ້າຄົງຄາ. ພ້ອມນີ້ ທ່ານທູດອິນເດຍ ຍັງຍິນດີໃຫ້ການຊ່ວຍເຫຼືອໃນການກໍ່ສ້າງສຸກສາລາແກ່ແຂວງເຊກອງ ເພື່ອຂະຫຍາຍຕາໜ່າງສາທາລະນະສຸກ ໃຫ້ປະຊາ ຊົນບັນດາເຜົ່າເຂົ້າເຖິງການບໍລິການຮັກສາສຸຂະພາບຫຼາຍຂຶ້ນ.

 

ວິ​ທີ​ກຳ​ຈັດ​ໜອນ​ນ້​ຳຍູງ​ລາຍ
Facebook ຂ່າວ​ເຊກອງ
Facebook ຂ່າວ​ໂທ​ລະ​ພາບ