ສະຫະພັນແມ່ຍິງພະແນກກະສິກໍາ-ປ່າໄມ້ສໍາເລັດກອງປະຊຸມໃຫຍ່ຄັ້ງທີ VIII

22/11/2022

ສະຫະພັນແມ່ຍິງພະແນກກະສິກໍາ-ປ່າໄມ້ສໍາເລັດກອງປະຊຸມໃຫຍ່ຄັ້ງທີ VIII

       ກອງປະຊຸມໃຫຍ່ຄັ້ງທີ  VIII ຂອງສະຫະພັນແມ່ຍິງຮາກຖານພະແນກກະສິກຳ ແລະປ່າໄມ້ແຂວງເຊກອງ ໄດ້ໄຂຂຶ້ນ ແລະ ສໍາເລັດລົງໃນວັນທີ 22 ພະຈິກນີ້ ທີ່ຫ້ອງປະຊຸມພະແນກດັ່ງກ່າວ ໂດຍມີສະຫາຍ ນາງ ວິໄລວັນ ດາລາສິນ ກໍາມະການພັກແຂວງ, ປະທານສະຫະພັນແມ່ຍິງແຂວງ, ສະຫາຍ ສົມຫວັງ ຂໍາມະວົງ ກໍາມະການພັກແຂວງ, ເລຂາຄະນະພັກຮາກຖານ, ຫົວຫນ້າພະແນກກະສິກໍາ-ປ່າໄມ້ແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.

    ສະຫາຍ ນາງ ນຸພາພອນ ໄມນີທອງ ປະທານສະຫະພັນແມ່ຍິງຮາກຖານພະແນກກະສິກໍາ-ປ່າໄມ້ແຂວງ ໄດ້ນໍາສະເໜີບົດລາຍງານການເມືອງທີ່ໄດ້ຢັ້ງຢືນເຖິງຜົນງານການຈັດຕັ້ງປະຕິບັດໜ້າທີ່ວຽກງານວິຊາສະເພາະ ແລະ ການເຄື່ອນໄຫວວຽກງານອື່ນໆໃນໄລຍະຜ່ານມາ ຊຶ່ງຍາມໃດກໍໄດ້ເອົາໃຈໃສ່ສືກສາອົບຮົມການເມືອງນໍາພາແນວຄິດໃຫ້ສະມາຊິກແມ່ຍິງພາຍໃນຮາກຖານຂອງຕົນຢ່າງເປັນປົກກະຕິ ໂດຍຖືເອົາການດໍາເນີນຊີວິດການເມືອງຂອງໜ່ວຍ, ຂະແໜງການ ແລະອົງການຈັດຕັ້ງມະຫາຊົນອື່ນໆເປັນບ່ອນຕໍານິກໍ່ສ້າງ, ຄົ້ນຄວ້າເຊື່ອຊຶມ, ກໍາແໜ້ນ ແລະຫັນເອົາແນວທາງ, ມະຕິຄໍາສັ່ງຂອງພັກ-ລັດ, ຂອງສູນກາງສະຫະພັນແມ່ຍິງລາວ ກໍຄືຂອງຄະນະບໍລິຫານງານສະຫະພັນແມ່ຍິງແຂວງ ມາເປັນແຜນງານ-ເປັນໂຄງການລະອຽດ ແລະພ້ອມກັນຈັດຕັ້ງປະຕິບັດໃຫ້ປະກົດຜົນເປັນຈິງ.

     ພ້ອມນັ້ນ ຄະນະຮາກຖານ ຍັງໄດ້ເອົາໃຈໃສ່ຊຸກຍູ້ ແລະ ປຸກລະດົມເອື້ອຍນ້ອງແມ່ຍິງພາຍໃນຮາກຖານປະຕິບັດໜ້າທີ່ວຽກງານວິຊາສະເພາະຕາມການມອບໝາຍຂອງຂັ້ນເທິງ ຕິດພັນກັບການສ້າງເສດຖະກິດ, ພັດທະນາຊີວິດການເປັນຢູ່ຕົນເອງ ແລະຄອບຄົວໃຫ້ດີຂື້ນເທື່ອລະກ້າວ, ມີຫຼາຍຄອບຄົວສາມາດສ້າງລາຍຮັບໄດ້ແຕ່ 20-60 ລ້ານກີບຕໍ່ປີ.

    ຂະນະດຽວກັນ ກອງປະຊຸມຍັງໄດ້ຜ່ານມະຕິ, ທິດທາງ ແລະ ຄາດໝາຍສູ້ຊົນໃນສະເພາະໜ້າ, ຈາກນັ້ນ ກໍໄດ້ດໍາເນີນການປ່ອນບັດຄັດເລືອກເອົາຄະນະຮາກຖານຊຸດໃໝ່ ໂດຍກອງປະຊຸມເຫັນດີເລືອກເອົາສະຫາຍ ນາງ ນຸພາພອນ ໄມນີທອງ ເປັນປະທານຄະນະສະຫະພັນແມ່ຍິງຮາກຖານ, ສະຫາຍ ນາງ ສູນທອນ ແກ້ວວັນນະລາ ເປັນຮອງປະທານ, ສະຫາຍ ນາງ ແພງຄໍາ ດາລາສິນ ເປັນປະທານກວດກາ, ສະຫາຍ ນາງ ຄໍາດີ ສຸວັນນະສາຍ ແລະ ນາງ ດວງສະຫວັນ ອິນທະຜາສຸກ ເປັນຄະນະ.

     ໂອກາດນີ້, ສະຫາຍ ນາງ ວິໄລວັນ ດາລາສິນ ກໍໄດ້ຕີລາຄາສູງຕໍ່ການນໍາພາ-ຊີ້ນໍາຂອງສະຫະພັນແມ່ຍິງຮາກຖານພະແນກ ກປຂ ໃນໄລຍະຜ່ານມາ ແລະຮຽກຮ້ອງໃຫ້ເສີມຂະຫຍາຍຜົນງານທີ່ພົ້ນເດັ່ນເຂົ້າໃນການຈັດຕັ້ງປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ, ພ້ອມທັງແບ່ງງານແບ່ງຄວາມຮັບຜິດຊອບໃຫ້ລະອຽດຈະແຈ້ງ, ສືບຕໍ່ສຶກສາອົບຮົມການເມືອງແນວຄິດໃຫ້ໃຫ້ເອື້ອຍນ້ອງແມ່ຍິງຢ່າງເປັນປົກກະຕິຕໍ່ເນື່ອງ, ຍົກສູງການປະຕິບັດລະບຽບລັດຖະກອນ, ກົດລະບຽບຂອງສະຫະພັນແມ່ຍິງລາວວາງອອກຢ່າງເຂັ້ມງວດ, ມີສະຕິລະວັງຕົວໃນການໃຊ້ສື່ສັງຄົມອອນລາຍ ແລະ ສະກັດກັ້ນຕ້ານທຸກບັນຫາປະກົດການຫຍໍ້ທໍ້ບໍ່ໃຫ້ເກີດຂຶ້ນໃນກົມກອງຂອງຕົນ ຕິດພັນກັບການປະຕິວັດວຽກງານວິຊາສະເພາະໃຫ້ສູງຂຶ້ນ, ພ້ອມນີ້ ຝຶກຝົນຫຼໍ່ຫຼອມຕົນເອງໃນທຸກດ້ານ ເພື່ອໃຫ້ໄດ້ຮັບພິຈາລະນາເຂົ້າໃນຕໍາແໜ່ງງານທີ່ເໝາະສົມໃນຕໍ່ໜ້າ.

 

ວິ​ທີ​ກຳ​ຈັດ​ໜອນ​ນ້​ຳຍູງ​ລາຍ
Facebook ຂ່າວ​ເຊກອງ
Facebook ຂ່າວ​ໂທ​ລະ​ພາບ