ສະຫະພັນແມ່ຍິງ ພະແນກ ກປຂ ເອົາໃຈໃສ່ສ້າງເສດຖະກິດຄອບຄົວ ມີລາຍຮັບແຕ່ 20-60 ລ້ານກີບ

24/11/2022

ສະຫະພັນແມ່ຍິງ ພະແນກ ກປຂ ເອົາໃຈໃສ່ສ້າງເສດຖະກິດຄອບຄົວ ມີລາຍຮັບແຕ່ 20-60 ລ້ານກີບ

     

    ທ່ານ ນາງ ນຸພາພອນ ໄມນີທອງ ປະທານສະຫະພັນແມ່ຍິງຮາກຖານພະແນກກະສິກໍາ ແລະປ່າໄມ້ (ກປຂ) ແຂວງເຊກອງ ໄດ້ລາຍງານການເຄື່ອນໄຫວວຽກງານຂອງສະຫະພັນແມ່ຍິງ ໄລຍະ 5 ປີ ຜ່ານມາ ໃນກອງປະຊຸມໃຫຍ່ສະຫະພັນແມ່ຍິງຮາກຖານພະແນກ ກປຂ ຄັ້ງທີ VIII ທີ່ໄດ້ໄຂຂຶ້ນໃນວັນທີ 22 ພະຈິກ 2022 ໃຫ້ຮູ້ວ່າ: ໃນໄລຍະຜ່ານມາ ຄະນະສະຫະພັນແມ່ຍິງຮາກຖານພະແນກ ກປຂ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ, ເຕົ້າໂຮມຄວາມສາມັກຄີພາຍໃນຖັນແຖວສະມາຊິກສະຫະພັນແມ່ຍິງໄດ້ເປັນປຶກແຜ່ນແໜ້ນໜາ ໂດຍນໍາເອົາມະຕິຄໍາສັ່ງຂອງພັກ-ລັດ ກໍຄືຂອງຂໍ້ແຂ່ງຂັນ 3 ດີ ຂອງແມ່ຍິງລາວວາງອອກ ມາເຜີຍແຜ່ເຊື່ອມຊຶມ ໃຫ້ເອື້ອຍນ້ອງແມ່ຍິງ ໄດ້ຮັບຮູ້ເຂົ້່າໃຈຢ່າງເລິກເຊິ່ງ ເພື່ອນໍາໄປຈັດຕັ້ງຜັນຂະຫຍາຍເຂົ້້າໃນການຈັດຕັ້ງປະຕິບັດວຽກງານຕົວຈິງ ແລະສ້າງລາຍຮັບເພື່ອຍົກລະດັບຊີວິດການເປັນຢູ່ຂອງຄອບຄົວໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

     ພ້ອມນີ້ ຄະນະສະຫະພັນແມ່ຍິງຮາກຖານ ຍັງໄດ້ເອົາໃຈໃສ່ປຸກລະດົມ, ຊຸກຍູ້ສົ່ງເສີມໃຫ້ເອື້ອຍນ້ອງແມ່ຍິງໃນຮາກຖານຂອງຕົນ ເຂົ້າຮ່ວມໃນການພັດທະນາເສດຖະກິດ, ຍົກລະດັບຊີວິດການເປັນຢູ່ຂອງຄອບຄົວໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ, ສ້າງກິດຈະກຳໃຫ້ມີລາຍຮັບສູ່ຄອບຄົວ ຕາມທ່າແຮງຂອງແຕ່ລະຄອບຄົວ ບວກກັບເງິນເດືອນທີ່ໄດ້ຮັບ ເພື່ອເຮັດໃຫ້ສະມາຊິກໄດ້ກາຍເປັນຄອບຄົວຕົວແບບໃນການສ້າງເສດຖະກິດຄອບຄົວ, ເຊິ່ງລວມມີ 8 ຄອບຄົວ ທີ່ສາມາດສ້າງລາຍຮັບແຕ່ 20 ລ້ານ 60 ລ້ານກີບ ຄື: ທ່ານ ນາງ ນຸພາພອນ ໄມນີທອງ ລ້ຽງເປັດ-ໄກ່ ແລະ ປູກພືດຜັກ ສ້າງລາຍຮັບ ສະເລ່ຍ 20 ລ້ານກີບຕໍ່ປີ; ທ່ານ ນາງ ວິໄລວັນ ວໍລະວົງ ບໍລິການຮ້ານປີ້ງແບ້ ສ້າງລາຍຮັບ ສະເລ່ຍ 20 ລ້ານກີບຕໍ່ປີ; ທ່ານ ນາງ ເພັດ ໄຊຍະພານທອງ ຂາຍເຄື່ອງອອນລາຍ, ຂາຍຜະລິດຕະພັນກະສິກຳ ສ້າງລາຍຮັບ ສະເລ່ຍ 20 ລ້ານກີບຕໍ່ປີ, ທ່ານ ນາງສີໃສ ສີຫາວົງ ຂາຍຢາແລະ ຂາຍໄຂ່ເປັດ-ໄຂ່ໄກ່ ສ້າງລາຍຮັບ 23 ລ້ານກີບຕໍ່ປີ; ທ່ານ ນາງ ພິດສະໄໝ ສືບຊາດ ກ້າເບ້ຍໄມ້, ປູກພືດຜັກ-ລ້ຽງສັດ ສ້າງລາຍຮັບ ສະເລ່ຍ 25 ລ້ານກີບຕໍ່ປີ, ທ່ານ ນາງ ຂັວນໃຈ ບໍລິການປິ່ນປົວສັດ ແລະ ຂາຍຢາ, ສ້າງລາຍຮັບໃຫ້ແກ່ຄອບຄົວ ສະເລ່ຍ 30 ລ້ານກີບຕໍ່ປີ, ທ່ານ ນາງ ສຸພາພອນ ພະສິດທິລາດ  ຂາຍເຄື່ອງຍ່ອຍ ແລະ ອາຫານທະເລ ສ້າງລາຍຮັບ ສະເລ່ຍ 30 ລ້ານກີບຕໍ່ປີ; ທ່ານ ນາງ ຄຳດ່ອນ ທອນສະຫວັນ ບໍລິການບ້ານພັກ, ຮ້ານອາຫານ ສ້າງລາຍຮັບ ສະເລ່ຍ 60 ລ້ານກີບຕໍ່ປີ. ຕິດພັນກັບການຈັດຕັ້ງປະຕິບັດຂໍ້ແຂ່ງຂັນ 2 ດີ ຂອງສະຫະພັນແມ່ຍິງລາວວາງອອກ ກໍຄືການຈັດຕັ້ງປະຕິບັດວຽກງານວິຊາສະເພາະຂອງຂະແໜງການຕົນ.

     ທ່ານ ນາງ ນຸພາພອນ ໄມນີທອງ ໃຫ້ຮູ້ຕື່ມວ່າ: ແຜນການ 5 ປີຕໍ່ໜ້າ ຈະເອົາໃຈໃສ່ສືບຕໍ່ຕິດຕາມ, ຊຸກຍູ້, ປຸກລະດົມ ເອື້ອຍນ້ອງແມ່ຍິງ ພາຍໃນຮາກຖານຂອງຕົນ ພ້ອມກັນສ້າງເສດຖະກິດຄອບຄົວໃຫ້ກຸ້ມຕົນເອງ ແລະສ້າງຄວາມເຂັ້ມແຂງດ້ວຍຕົນເອງ ຕາມເງື່ອນໄຂ ແລະ ທ່າແຮງຂອງແຕ່ລະຄອບຄົວ, ເພື່ອປັບປຸງຊີວິດການເປັນຢູ່ຂອງຄອບຄົວໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ ແລະ ເປັນຄອບຄົວຕົວແບບໃຫ້ໄດ້ຕື່ມອີກ 8 ຄອບຄົວ; ພ້ອມທັງ ຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວວາງອອກຢ່າງແຂງແຮງ.

ຂ່າວ: ພຸດທະສອນ

 

ວິ​ທີ​ກຳ​ຈັດ​ໜອນ​ນ້​ຳຍູງ​ລາຍ
Facebook ຂ່າວ​ເຊກອງ
Facebook ຂ່າວ​ໂທ​ລະ​ພາບ